ЖЕР СІЛКІНІСІ КЕЗІНДЕГІ ҚАУІПСІЗДІК – ӘР АЗАМАТТЫҢ ЖАУАПКЕРШІЛІГІ

Жер сілкінісі – алдын ала нақты уақытын болжау қиын табиғи құбылыстардың бірі. Ол қысқа уақыт ішінде үлкен аумақтағы ғимараттарға, инфрақұрылымға және адамдардың қауіпсіздігіне әсер етуі мүмкін. Сондықтан әр азамат жер сілкінісі кезінде өзін қалай ұстау керектігін алдын ала білгені маңызды.

Жер сілкінісі кезіндегі ең басты талап – сабыр сақтап, дүрбелеңге жол бермеу. Қорқынышқа беріліп, ғимараттан асығыс шығуға әрекет жасау жарақат алу қаупін арттыруы мүмкін.

Егер адам ғимарат ішінде болса, терезелерден, ауыр жиһаздардан және құлап кетуі мүмкін заттардан алыстаған жөн. Қауіпсіз орынға – берік үстелдің немесе басқа қорғаныш нысанының жанына орналасып, бас пен мойынды қорғау қажет. Лифтіні пайдалануға болмайды.

Жер сілкінісі кезінде сыртта жүрген азаматтар ғимараттардан, электр бағаналарынан, ағаштардан және басқа да құлау қаупі бар нысандардан алшақ тұруы керек. Автокөлікте болған жағдайда көлікті қауіпсіз жерге тоқтатып, дүмпу аяқталғанша көліктің ішінде қалған дұрыс.

Жер сілкінісі аяқталғаннан кейін де қауіп толық сейілді деп есептеуге болмайды. Қайталама дүмпулер болуы мүмкін. Сондықтан зақымданған ғимараттарға қайта кірмей, құтқару қызметтерінің нұсқауларын орындау қажет.

Алдын ала дайындық та ерекше маңызды. Әр отбасында төтенше жағдайда қажет болатын құжаттар, дәрі-дәрмектер, су, азық-түлік, фонарь және байланыс құралдары бар төтенше сөмке дайын болғаны жөн. Отбасы мүшелері қауіпсіз орын мен ғимараттан шығу жолдарын алдын ала біліп, төтенше жағдай кезінде кімге және қалай хабарласатынын келісіп алғаны дұрыс.

Балаларға жер сілкінісі кезінде не істеу керектігін түсіндіру де маңызды. Оларға дүрбелеңге түспеу, ересектердің нұсқауын тыңдау және қауіпті заттардан аулақ болу қажеттігін үйрету қажет.

Жер сілкінісі кезінде қауіпсіздік ережелерін білу – төтенше жағдайға дайындықтың маңызды бөлігі. Табиғи апаттың алдын алу мүмкін болмағанымен, дұрыс әрі сауатты әрекет ету арқылы оның салдарын азайтуға болады.

Есте сақтаңыз: сабыр, дайындық және дұрыс әрекет – жер сілкінісі кезіндегі қауіпсіздіктің негізгі кепілі. Төтенше жағдайда 112 нөміріне хабарласыңыз.