ӘДІЛЕТТІ ҚАЗАҚСТАН ҚҰРУҒА ЖАҢА ТАРИХИ ҚАДАМ

«Әділетті Қазақстанды құру жолында түбегейлі және жан-жақты реформаларды табысты жүзеге асыру үшін халықтың жаңа сенім мандаты қажет. Мен үшін мемлекет мүддесі бәрінен биік. Сондықтан мен өкілеттік мерзімімді қысқартуға және кезектен тыс Президент сайлауына баруға дайынмын», — деп Мемлекет басшысы Қасым-Жомарт Тоқаев Парламент отырысында биылғы күзде кезектен тыс президент сайлауын өткізуді ұсынған болатын.

Сол саяси науқанға, халықтың көзқарасы мен пікірі оң деп білемін. Себебі, елдің іргесін берік ұстап, әлем елдерімен саяси тұрақтылықта болатын, ата-бабамыздан мұра болып қалған ұлан-байтақ жеріміз бен ана тіліміз, мәдениетімізді сақтап, келешек ұрпаққа жеткізуші басшының болғанын қалаймыз.

Халыққа, ең алдымен, тұрақтылық пен тыныштық керек. Президент тағына елдің жағдайын ойлайтын, қарапайым, халықтың қамын жейтін, елжанды азаматты сайлау арқылы жаңылмай табады деп ойлаймын. «Ел ағасыз болмас, тон жағасыз болмас» дегендей, елдің билігін өз қолына алып, Тәуелсіздігімізді тұғырлы, берекемізді баянды етіп, «Жаңа әрі әділетті Қазақстанды» бастайтын Президент сайлап, алға қойған мақсатымызға жетеміз деген сенімдеміз!

Біржан САРЖАНОВ,
«АСАР» Түркістан облыстық мүгедектер қоғамы Созақ аудандық филиалының төрағасы, аудандық қоғамдық кеңестің мүшесі