ТҮРКІСТАН: ТӨЛЕБИ АУДАНЫНДА 125 ОТБАСЫ ТОЗЫҒЫ ЖЕТКЕН ҮЙДЕН ЖАҢА БАСПАНАҒА ҚОНЫС АУДАРАДЫ
Төлеби ауданында апатты жағдай алдында тұрған екі қабатты 8 үйдің тұрғындарына, яғни 125 отбасыға жаңа үйлер беріледі.
Ескі үйлер 1935 жылдары пайдалануға берілген. Бүгінде үйлердің әбден тозығы жеткен. Осы орайда аудан әкімі Төлеген Тұртайұлының тапсырмасымен қысқа мерзімде жаңа үйлердің құрылысын құжаттандыру жұмыстары аяқталды. Бұл ретте, 156 пәтерлі бес қабатты 3 тұрғын үйдің құрылысын бастауға 2023 жылға облыстық бюджеттен қаржы бөлінген.
Бұл баспаналар облыс әкімдігі мен салалық басқармалардың қолдауымен Леңгір қаласының I мөлтек ауданына қарасты Қапал Батыр көшесінің бойынан салынбақ. Құрылыс жұмыстарына қатысты ауқымды жұмыстар 2024 жылы да жалғасады. Алдағы уақытта жаңа пәтерлерді иелеріне тапсыру жұмыстары ҚР «Тұрғын үй қатынастары туралы» Заңына сәйкес іске асырылады. Бұл жөнінде пәтер иелеріне түсіндірме жұмыстары жүргізілген.
Жаңа үйлер бюджет есебінен сыртқы инфрақұрылым жүйелерімен яғни ауыз су, кәріз жүйесі, электр желісі, табиғи газ, автономды жылытумен қамтылады. Жоба іске асқан жағдайда, пәтерлері апатты жағдай алдында тұрған 125 отбасы баспаналы болады.
Ara24.kz қоғамдық-саяси, ақпараттық танымдық, сатиралық сайт
Жүз жылдық тарихы бар азуын айға білеген «Ара» журналын әлеуметтік желі арқылы қайта жаңғыртып, қанат қақтыруды мақсат етіп отырмыз. Мұнда əзіл-сықақ, əжуа, мысал-мысқыл, пародия, эпиграмма, оқшау сөз секілді сатираның əрқилы саласын қамтып қана қоймай, алаяқтардың атын атап, түсін түстейтін яғни, нақты фактіге құрылған фельетон жанрын жандандырмақпыз. Біздің бағдарламаға баса назар аударсаңыз күлесіз де білесіз, білесіз де күлесіз. Əзілдеріңіз жарасып, əжімдеріңіз күлкінің ізін ғана көрсететіні сөзсіз.
