ТҮРКІСТАНДА ЖАСАНДЫ ИНТЕЛЛЕКТ ЖАҢА МҮМКІНДІКТЕРГЕ ЖОЛ АШУДА
Түркістан облысында жасанды интеллект пен цифрландыру бағытындағы жұмыстар жүйелі түрде жүзеге асырылуда. 2026 жылдың Қазақстанда Цифрландыру және жасанды интеллект жылы болып жариялануына орай, өңірде бұл бағыттағы бастамалар білім беру, қауіпсіздік, инфрақұрылым және денсаулық сақтау салаларын қамтып отыр. Президент тапсырмалары аясында жасанды интеллект пен цифрлық технологиялар басқару мен мемлекеттік қызметтің негізгі құралдарының біріне айналуда.
Өңірде халықаралық талаптарға сай ашылған Woosong University Kazakhstan IT университеті болашақ IT-мамандарын даярлауда. Қазіргі таңда «Жасанды интеллект және үлкен деректерді талдау» және «Бағдарламалық қамтамасыз ету» бағыттары бойынша 100-ден астам студент білім алып жатыр. Университеттің ғылыми және технологиялық әлеуетін ауыл шаруашылығы, кәсіпкерлік, білім беру және денсаулық сақтау салаларына енгізу бағытында бірлескен жобалар қарастырылған. Жастарды қолдауға ірі компаниялар да тартылуда. «Қазақтелеком» АҚ, «Транстелеком» АҚ және «Freedom Holding» корпорациялары студенттерге грант бөліп, оқу аяқталғаннан кейін жұмысқа орналастыру мүмкіндігін қарастыруда.
Денсаулық сақтау саласында 2026 жылы радиологиялық зерттеулерді орталықтандыру жобасын іске қосу жоспарланған. PACS жүйесі арқылы өкпе, сүт безі обыры және өзге де ауруларды ерте анықтау мүмкіндігі артып, диагностика сапасы жақсарады.
Қауіпсіздік саласында «Таза Қазақстан» акциясы аясында облыс әкімдігінде орналасқан Ахуалдық орталықтың мүмкіндігі кеңейтілуде. Бейнебақылау камераларының саны арттырылып, алдағы уақытта жасанды интеллект арқылы қоғамдық тәртіпті бұзу, қоқыс тастау және тыйым салынған заттарды алып жүру деректері автоматты түрде анықталып, полиция органдарына жедел жолданатын болады.
Инфрақұрылым саласында Кентау қаласындағы Оранғай су тазарту станциясына су жеткізу жүйесі толықтай SCADA автоматтандырылған жүйесі арқылы бақылануда. Бұл жүйе су қысымы мен шығын көлемін нақты уақыт режимінде бақылап, ақаулардың алдын алуға мүмкіндік береді.
Өңірдегі IT-экожүйені дамытуда Turkistan Hub аймақтық IT-хабы маңызды рөл атқаруда. Ашылғаннан бері хабта 3500-ден астам оқушы мен студенттің қатысуымен 225-тен астам іс-шара өткізілді. Сонымен қатар Қожа Ахмет Яссауи атындағы ХҚТУ-мен бірлескен YASAWI STARTUP инкубациялық бағдарламасы аясында бірқатар жобалар дайын өнім деңгейіне жетіп, нарыққа шығуға жақындады.
Биыл Түркістан облысында жасанды интеллект пен цифрландыру бағытындағы жұмыстар нақты жобалар арқылы жүзеге асырылып, өңір тұрғындарының өмір сапасын арттыруға және аймақтың технологиялық дамуына бағытталуда.
Ara24.kz қоғамдық-саяси, ақпараттық танымдық, сатиралық сайт
Жүз жылдық тарихы бар азуын айға білеген «Ара» журналын әлеуметтік желі арқылы қайта жаңғыртып, қанат қақтыруды мақсат етіп отырмыз. Мұнда əзіл-сықақ, əжуа, мысал-мысқыл, пародия, эпиграмма, оқшау сөз секілді сатираның əрқилы саласын қамтып қана қоймай, алаяқтардың атын атап, түсін түстейтін яғни, нақты фактіге құрылған фельетон жанрын жандандырмақпыз. Біздің бағдарламаға баса назар аударсаңыз күлесіз де білесіз, білесіз де күлесіз. Əзілдеріңіз жарасып, əжімдеріңіз күлкінің ізін ғана көрсететіні сөзсіз.
