1150 ҚЫЗМЕТКЕРДІҢ ЖАЛАҚЫ ҚАРЫЗЫ ӨНДІРІЛГЕН

48

«Шымкент қаласы кәсіподақтар орталығы» аумақтық кәсіподақтар бірлестігінің төрағасы Бауыржан Әлтеевтің төрағалығымен әлеуметтік әріптестік және әлеуметтік-еңбек қатынастарын реттеу жөніндегі үшжақты комиссияның отырысы өтті. Комиссияның бүгінгі отырысы Еңбек күні қарсаңында ұйымдастырылды.

Отырыстың күн тәртібі әлеуметтік әріптестік шеңберінде еңбек қатынастарын, оның ішінде кәсіподақ қызметін реттеудің бірқатар маңызды мәселелерін қамтыды. Атап айтқанда, кәсіподақ бірлестіктері мен кәсіпкерлер және заңды тұлғалар бірлестігі арасындағы 2024-2026 жылдарға арналған өңірлік келісімді бекіту, Шымкент қаласының аумағында еңбек қатынастары, еңбек қауіпсіздігі және еңбекті қорғаудағы озық тәжірибелермен таныстыру болды.
Шымкент қаласы мемлекеттік еңбек инспекциясы басқармасының басшысы Б.Қалжанов қаладағы жағдайды баяндап, Қазақстан Республикасындағы 2030 жылға дейінгі қауіпсіз еңбек тұжырымдамасындағы еңбекті қорғаудың жаңа идеологиясы: кәсіптік тәуекел дәрежесі бойынша жеке қорғаныс құралдарын таңдау, сақтандыру тарифтері, әлеуметтік кепілдіктер, еңбекті қорғау саласындағы кәсіптік құзыреттерді дамыту, мемлекеттік бақылау, кәсіптік тәуекелдерді басқару туралы түсіндіріп өтті.
Сондай-ақ, қаладағы бірнеше компания өкілдері «Қауіпсіз еңбек жылы» аясында тұжырымдама бойынша атқарылатын жұмыс жоспарлары мен тәжірибелерімен бөлісті.
Айта кетейік, Шымкент қаласында әлеуметтік әріптестік және әлеуметтік, еңбек қатынастарын реттеу жөніндегі үшжақты өңірлік комиссия өткен жылы 6 отырыс өткізіп, кәсіподақтар бірлестігімен еңбек дауларын және жалақы бойынша борыштарды өндіру мәселелерін қараған. Нәтижесінде, қаланың 70 кәсіпорнында 1 150 қызметкерге 484,7 млн. теңге жалақы қарыздары төленген. Сондай-ақ, қызметкерлердің құқықтары мен мүдделерін көздейтін мәселелер енгізілген.

Салтанат ЖАМАЛДИНОВА