ӨЗ ДӘУІРІНІҢ ДАРА ҚАЙРАТКЕРІ

Бүгін ауданда мемлекет және қоғам қайраткері Нұртас Оңдасыновтың 120 жылдығына арналған «Тарих және тұлға» атты ғылыми теориялық конференция өтті. Конференция жұмысына елімізге танымал қоғам қайраткерлері, жазушы, ғалымдар, тарихшылар, ардагерлер, мәслихат депутаттары, зиялы қауым өкілдері, белсенді жастар қатысты.

Шараға келген көпшілік алдымен аудан орталығындағы дара тұлғаның ескерткішіне гүл шоқтарын қойып, өмір жолындағы елеулі еңбектері жайында естеліктерімен бөлісті. Еске алу жиынына аудан әкімі Қайрат Жолдыбайұлы мен аудандық мәслихат төрағасы Уалихан Ұзақов қатысып, өмір жолы мен оның еліміздің әлеуеті мен экономикасын дамытуға, қазақ ғылымы мен мәдениетін, қазақ тіл білімін насихаттауға қосқан үлесі жайында айтып өтті.

Сондай-ақ, өлкетанушы, этнолог, мәдениет қайраткері Абдулла Жұмашов пен жазушы, ардагер ұстаз Арысбек Тәжиевтер ұлт қайраткерінің тұлғалық және кәсіби қасиеттеріне, келешек ұрпаққа қалдырған мол мұрасының құндылығына тоқталды.

Мұнан соң келелі жиын аудандық мәдениет сарайында «Тарих және тұлға» атты ғылыми теориялық конференциямен жалғасын тапты. Жиынға келген қонақтар аудандық орталық кітапхананың «Н.Оңдасынов өз дәуірінің дара қайраткері» атты кітап көрмесін көріп, Түркістан қаласындағы Н.Оңдасынов атындағы өлкетану музейінің фото галереясын, қайраткердің ұстанған заттары мен киген киімдері қойылған көрмені тамашалады.

Одан әрі жиынның ашылуында сөз алған аудан әкімі Қайрат Жолдыбайұлы ғылыми-теориялық конференцияда тұлғаның саяси, рухани, тарихи болмысын ашып, тың деректер айтылатынына сенім білдіріп, конференция жұмысына сәттілік тіледі.

Аудан басшысы өз сөзінде: «Даналық келбеті ұлт жадында мәңгі сақталған Н.Оңдасыновтың өмірі мен еңбектерін зерттей отырып, деректер қатарын толықтыру және тұлғаның есімін елге таныту біздің басты мақсатымыз. Сондықтан бүгінгі конференцияның кейінгі жастарға берері көп деп санаймын» — деді.

Сонымен қатар шарада әдебиетші, сыншы, публицист, филологи ғылымының докторы, профессор Құлбек Ергөбек, аудандық мәслихат депутаты Мұхтар Есжанов, «А.Асқаров» қорының президенті Ерқуат Бизақов, «Н.Оңдасынов» қорының төрағасы Серік Үркімбаев, Отырар ауданының Құрметті азаматы, еңбек ардагерлері Мырзахмет Темірбек пен Мүтәлхан Әбілаханов, медицина ғылымның докторы, профессор, белгиялық Оспан Мыңбаевтар ел тарихындағы қиын-қыстау кезеңдерде мемлекетті 13 жыл әділ басқарған Н.Оңдасыновтың өмірі мен шығармашылығы туралы баяндама жасап, ұсыныс-пікірлерін айтты.

Шара барысында «Отырар әдебиеті және өнері» қоғамдық бірлестігінің төрағасы, белгілі ақын Дәурен Полатбаев ұлтқа еңбегі сіңген ұлы тұлғаның тұлғалық келбеті жайында арнау өлеңін оқыса, Ресей елінен арнайы келген қайраткердің немересі Нұртас дара перзентін есске алып жатқан туған елінің ыстық ықыласы мен ерекше ілтипатына алғысын айтты.

Конференцияда қазақ үшін аянбай еңбек еткен қайраткердің артына қалдырған мұрасы кеңінен насихатталып, білім беру ұйымдарында «Тұлғаны тану» секілді үйірме сабақтарына Н.Оңдасыновтың өмірі мен шығармашылығы туралы тақырыптарды енгізу туралы ұсыныстар айтылды.