Қажымұқан кесенесіне тағзым: Төлеген Бүкіровтің Ордабасыға сапары
Бүгін Ордабасы ауданына қазақ ғылымы мен өндірісінің өркендеуіне өлшеусіз үлес қосқан, Жезқазған сирек металл өндірісінің дамуына сүбелі еңбегі сіңген, елге белгілі тұлға, Ұлытау облысының және Жезқазған қаласының Құрметті азаматы Төлеген Бүкіров арнайы іссапармен келді.
Сапар барысында Төлеген Нұрмағанбетұлы қазақтың аты аңызға айналған алып күш иесі Қажымұқан Мұңайтпасовтың кесенесіне зиярат етіп, батыр бабамыздың рухына құран бағыштады. Сондай-ақ, даңқты балуанның өмірі мен ерліктерін дәріптейтін Темірлан ауылындағы Қажымұқан атындағы облыстық спорт мұражайына ат басын бұрды.
Төлеген Бүкіровті Ордабасы ауданының әкімі Азат Оралбаев пен Түркістан облыстық мәслихатының депутаты Дулат Әбіш жылы қарсы алып, құрмет көрсетті. Қонаққа қазақы дәстүрмен шапан жауып, Ордабасы ауданының 60 жылдығына орай жарық көрген «Ордабасы – киелі мекен» кітабын және Қажымұқан Мұңайтпасовтың мүсінін сыйға тартты.
Бұл кездесудің мәні тереңде. Төлеген Бүкіров сынды елге еңбегі сіңген азаматтардың Қажымұқан баба рухына тағзым етуі – ұлттық бірлігіміз бен тарихи мұрамызға деген құрметтің айқын көрінісі. Мұндай игі бастамалар жас ұрпаққа өнеге болып, ұлт руханиятының өркендеуіне өз үлесін қоспақ.
Ara24.kz қоғамдық-саяси, ақпараттық танымдық, сатиралық сайт
Жүз жылдық тарихы бар азуын айға білеген «Ара» журналын әлеуметтік желі арқылы қайта жаңғыртып, қанат қақтыруды мақсат етіп отырмыз. Мұнда əзіл-сықақ, əжуа, мысал-мысқыл, пародия, эпиграмма, оқшау сөз секілді сатираның əрқилы саласын қамтып қана қоймай, алаяқтардың атын атап, түсін түстейтін яғни, нақты фактіге құрылған фельетон жанрын жандандырмақпыз. Біздің бағдарламаға баса назар аударсаңыз күлесіз де білесіз, білесіз де күлесіз. Əзілдеріңіз жарасып, əжімдеріңіз күлкінің ізін ғана көрсететіні сөзсіз.
