ИНТЕРНЕТ АЛАЯҚТЫҚТЫҢ АЛДЫН АЛУ ШАРАЛАРЫ ҚАРҚЫНДЫ ЖАЛҒАСУДА

Сарыағаш ауданы аумағында интернет алаяқтықтың алдын алу мақсатында жедел профилактикалық іс-шара ұйымдастырылуда. Шараның басты мақсаты – тұрғындар арасында интернет-алаяқтықтың түрлері туралы кеңінен ақпарат таратып, оның алдын алу.

Кездесу барысында азаматтарға кең таралған алаяқтық түрлері – жалған интернет-дүкендер, өзін банк қызметкері ретінде таныстыратын қоңыраулар, жалған инвестициялық ұсыныстар және әлеуметтік желілер арқылы алдау тәсілдері полицейлер тарапынан нақты мысалдармен түсіндірілді.

Мамандар интернетті қауіпсіз пайдаланудың негізгі ережелерін атап өтті: бейтаныс адамдарға жеке деректерді бермеу, күмәнді сілтемелерге өтпеу, тексерілмеген сайттардан сатып алмау және белгісіз нөмірлерден түскен қоңырауларға сенбеу.

– Алаяқтар түрлі психологиялық әдістерді қолдана отырып, азаматтарды алдауға тырысады. Сондықтан әр адам өзінің киберқауіпсіздігіне мұқият қарауы қажет. Алдын алу – ең тиімді тәсіл, – дейді полицейлер осы тұста.

Полиция өкілдері тұрғындарды қырағы болуға және күмәнді жағдай туындаған кезде бірден құқық қорғау органдарына жүгінуге шақырады.