ҰЛЫ ОТАН СОҒЫСЫНДА ҚАЗА ТАПҚАН БАТЫРЛАРДЫҢ РУХЫНА ТАҒЗЫМ ЕТІЛДІ

Шымкент қаласында 9 Мамыр – Жеңіс күніне арналған салтанатты іс-шара өтті. Бұл ел тарихындағы ең маңызды күндердің бірі саналады және бейбітшілік пен еркіндік жолында жанын қиған батырлардың ерлігін ұлықтап, кейінгі ұрпақты бірлікке үндейді.

Абай саябағы аумағындағы Ұлы Отан соғысының қаһармандарына арналған Даңқ мемориалына гүл шоқтарын қою рәсімі өтті. Іс-шараға қала әкімі Ғабит Сыздықбеков, тыл еңбеккерлері, қоғам өкілдері, қала тұрғындары мен жастар қатысты.

Рәсімге қатысушылар боздақтарды бір минут үнсіздікпен еске алып, мемориалға гүл шоқтарын қойды, олардың ерлігі мен жанқиярлығына тағзым етті. Жеңіс күні – ерлік пен батылдықтың, халықтың бірлігі мен төзімділігінің символы. Бұл күн бейбіт өмірдің қадірін білуге шақырады және тарих алдындағы жауапкершілікті еске салады.

Айта кету керек, өткен жылы Шымкент қаласындағы Ұлы Отан соғысының соңғы ардагері өмірден өтті. Оның дүниеден озуымен жеңімпаз ұрпақпен арадағы жанды байланыс үзілгенімен, батырлардың ерлігі халық жадында, өткенге деген құрметпен және жас ұрпақ тәрбиесінде мәңгі сақталады.

Бүгінгі іс-шара қаһарман сарбаздардың ерлігіне деген терең құрметтің белгісіндей болып, тарихи жадыны есте сақтау, бірлік пен ұрпақтар сабақтастығының маңызын тағы бір рет айқындады.

Қазақ халқының батыр ұлдары мен қыздары соғыстың ең қиын сәттерінде қайсарлық танытып, ерлік пен батылдықтың үлгісін көрсетті. Бауыржан Момышұлы, Мәлік Ғабдуллин, Талғат Бигелдинов, Мәншүк Мәметова, Әлия Молдағұлова сияқты қаһармандардың есімі халық жадында мәңгі сақталады. Олардың ерлігі – бүгінгі ұрпақ үшін үлкен өнеге.

Майданға аттанған әрбір жауынгердің артында ата-анасы, жары, балалары мен туған-туыстары қалды. Олар жақындарының аман оралуын күтті. Алайда соғыс көптеген отбасына орны толмас қайғы әкелді. Мыңдаған шаңырақ қара жамылып, талай ананың жүрегіне жара түсті.

Бүгінде біз бейбіт аспан астында өмір сүріп келеміз. Бұл бейбітшіліктің артында ата-бабаларымыздың төгілген қаны мен жасаған ерлігі жатыр. Сондықтан Ұлы Отан соғысында қаза тапқан жауынгерлердің есімін ұмытпау – әрбір ұрпақтың қасиетті парызы.

Жыл сайын Жеңіс күні қарсаңында ардагерлерге құрмет көрсетіліп, соғыста қаза тапқан боздақтарды еске алу шаралары өткізіледі. Ескерткіштерге гүл шоқтары қойылып, олардың рухына тағзым етіледі. Бұл – өткенге құрмет, бүгінге шүкіршілік және келешек ұрпаққа аманат.

Қаза тапқан батырлардың рухына тағзым ету – олардың ерлігін есте сақтау ғана емес, бейбітшіліктің қадірін түсіну. Соғыстың қайғысы ешқашан қайталанбауы керек. Біз батырлардың ерлігін ұмытпай, жас ұрпақты отансүйгіштікке, елін қорғауға және бейбітшілікті бағалауға тәрбиелеуіміз қажет.