АВТОРЛЫҚ ЖОБАСЫ АРҚЫЛЫ БҮЛДІРШІНДЕРДІ КІТАПҚА БАУЛЫҒАН
Шымкент қаласында бастауыш сыныбында бүлдіршіндерді кітап оқуға баулып, сана көкжиегін кеңейту жолында Гүлнұр Оразбекова түрлі жобаларды жүзеге асырып отыр.
Қаладағы №23 мектеп-лицейінде 25 жылдан бері тапжылмай бастауыш сыныбында қызмет атқаратын Гүлнұр Рысбекқызы біліктігі және ізденімпаздығымен әріптестері арасында үлкен абыройға ие.
Ол ел тәуелсіздігінің алғашқы жылдарында ұлттық құндылықтар негізінде жеке тұлғаны тәрбиелеу мақсатында ашылған «Ұлттық дүниетаным» экспериментіне қатысқан. Бастауыш сыныптарында осы сабақты жүргізіп, ҚР білім беру ісінің үздігі, доцент Аюбай Құралұлымен бірге «Ұлттық дүниетанымды оқыту әдістемесі» әдістемелік құралына авторлық етті.
Ал 2003-2007 жылдары «Өзін-өзі тану» рухани-адамгершілік білім беру бағдарламасын жүзеге асыру жөніндегі экспериментте болды. Әріптестерінің пікірінше, Өзін-өзі танудың бастауында болуы пәннің оқушыларға ашқысы келетін рухани-адамгершілік білім мен қасиеттердің Г.Оразбекова өз бойында педагогикалық әдеппен үйлесім табуында болса керек. Пән эксперименті аясында, өңірлік, республикалық семинарларда сабақ беріп, тәжірибе алмасты. Курсты енгізудегіи шеберлігі үшін 2004 жылы «Бөбек» қорының алғыс хатымен марапатталды.
Гүлнұр Рысбекқызы бастауыш сынып оқушыларын кітап оқуға баулу, оқушының оқуындағы кедергіні жою арқылы оқуға ынтасын сақтап қалуы үшін мектепте «100 автор, 100 әңгіме» жобасын іске асырды.
–Балаларға арналған кітап жарық көрсе оның көбі өз оқырманына жетпейді. Сондықтан оқу бағдарламасында қарастырылмаған 100 автордың 100 әңгімесін жинақтап, оқушының көзқарас көкжиегін кеңейтуге тырыстым. Жобаға оқушыны ата-анасымен қатыстыра отырып, отбасымен кітап оқуға тәрбиелеуді көздедім. Аталған жоба қалалық семинарда тәжірибе ретінде таратылып, өзге әріптестерім ыстық ықыласпен қабылдады, -дейді ұстаз.
Қазіргі таңда ұстаз «Оқуға құштар мектеп» республикалық жобасы аясында жұмысты белсенді атқаруда. Сонымен қатар, оқушыларға заманауи жарнама түрін қолдану мақсатында буктрейлер байқауын ұйымдастырды. Үздік буктрейлерлер республикалық «25 кітап, 25 ән» байқауында жүлделі орыннан көрінді.
Ara24.kz қоғамдық-саяси, ақпараттық танымдық, сатиралық сайт
Жүз жылдық тарихы бар азуын айға білеген «Ара» журналын әлеуметтік желі арқылы қайта жаңғыртып, қанат қақтыруды мақсат етіп отырмыз. Мұнда əзіл-сықақ, əжуа, мысал-мысқыл, пародия, эпиграмма, оқшау сөз секілді сатираның əрқилы саласын қамтып қана қоймай, алаяқтардың атын атап, түсін түстейтін яғни, нақты фактіге құрылған фельетон жанрын жандандырмақпыз. Біздің бағдарламаға баса назар аударсаңыз күлесіз де білесіз, білесіз де күлесіз. Əзілдеріңіз жарасып, əжімдеріңіз күлкінің ізін ғана көрсететіні сөзсіз.
