Бірлік бар жерде – береке бар: Түркістан тұрақтылықтың тірегіне айналуда

Қазақстан қоғамындағы бірлік пен тұрақтылық – ел дамуының басты құндылықтарының бірі. Бұл қағида, әсіресе, Түркістан қаласының өркендеу жолында ерекше көрініс табуда. Ел Президентінің бастамасымен жүзеге асып жатқан реформалар мен даму жоспарлары Түркістанды тек тарихи емес, заманауи рухани және мәдени орталық ретінде қалыптастырып отыр. Түркістан – ғасырлар бойғы бірлік пен мәміленің символы. Қожа Ахмет Ясауи кесенесінің төңірегіндегі рухани кеңістік бүгінде әртүрлі этностар мен дін өкілдерінің татулығын айғақтайтын қоғамдық келісім алаңына айналды. Мұнда ұлтаралық қатынастар саласындағы саясат пен қоғамдық тұрақтылық мәселелері елдік деңгейде жүргізілуде.

Бүгінде қалада этносаралық татулықты насихаттайтын дөңгелек үстелдер, жастар мен қоғамдық ұйымдарға арналған бірлік форумдары, мешіттер мен мәдени орталықтарда бейбітшілікке шақыратын ақпараттық кездесулер ұйымдастырылуда. Ақпараттық жұмыстар аясында әлеуметтік желілер, БАҚ және қоғамдық кеңестер арқылы халыққа елдегі тұрақтылықтың маңызы, мемлекеттік саясаттағы бейбіт қатар өмір сүру ұстанымдары, Түркістанның даму үлгісіндегі бірлік пен жауапкершілік ұғымы кеңінен түсіндірілуде. Қоғамдық сананы біріктіру – тұрақты елдің негізі. Түркістанның бүгінгі тыныштығы – әр азаматтың бейбіт болашаққа қосқан үлесі. Осы құндылықтар арқылы біз қоғамда сенім, келісім және рухани өрлеуді нығайтамыз.

Бірлік – барлық игіліктің бастауы. Мемлекеттің мәңгілік тұрмағы, тәуелсіздіктің берік болмағы, жердің тұтас болып қалмағы, елдің өркендеу жолынан таймауы – бәрі халықтың бірлігіне, ынтымақты тірлігіне байланысты. Ұлт пен ұлыс, мәдениет пен мәдениет арасындағы интеграция мен коммуникацияны жолға қоюда, түрлі салт-дәстүр, тіл мен татулықты сақтауда Ассамблеяның қоғамдық құрылымдары үлкен рөл атқарады. ҚХА-ның біріктіруші әлеуеті де солар арқылы жүзеге асырылады екен. Президент Қасым-Жомарт Тоқаев ҚХА-ның ХХХІV сессиясында мемлекет алдындағы басты міндет ретінде – халықтың татулығы мен ауызбіршілігін, мемлекетіміздің тұтастығы мен киелі Тәуелсіздігімізді нығайтуды атады. Алдағы уақытта да солай болып қала бермек. Осы құндылықтардан айрылмасақ, айбынды етсек, Азаттықтың жетістіктерін еселеп, жемісін арттырып, елді келер ұрпаққа аман аманаттай аламыз.

Еліміздегі татулықтың тірегіне, ынтымақтың ұйытқысына айналған Қазақстан халқы Ассамблеясының тарихы – тәуелсіз Қазақстанның тарихы деп айтуға болады. Кез келген елдің тұрақты дамуына мемлекет ішіндегі береке-бірлік, қоғамдық тұтастық, халықтың ынтымағы тікелей әсер ететіні сөзсіз. Құрылған күнінен бастап даму мен өрлеудің түрлі кезеңдерін өткерген Қазақстан халқы Ассамблеясы бүгінде ел этностарының әлеуетін мемлекетіміздің орнықты дамуы мен өркендеуіне бағыттайтын, қоғамның барлық мүшесін ортақ мақсатқа жұмылдыратын беделді ұйымға, өзге елдерге үлгі боларлық бірегей институтқа айналды. Мемлекет басшысы Қасым-Жомарт Тоқаев Қазақстан халқы Ассамблеясының «Бірлік. Жасампаздық. Өрлеу» атты ХХХІІІ сессиясында сөйлеген сөзінде: «Бұл құрылым өзін этносаралық келісім мен жалпыұлттық бірлікті нығайту жолында сындарлы саясат жүргізе алатын тиімді құрал ретінде танытты» деп, Ассамблеяның рөлін айрықша атап өтті. Ассамблеяның қызметі Қазақстан этностарының азаматтық және рухани-мәдени тұтастығы негізінде еліміздегі қоғамдық келісім мен жалпыұлттық бірлікті қамтамасыз етуге бағытталған.