ЗАҢҒА СӘЙКЕС ҚҰРЫЛЫС – ҚАЛАМЫЗДЫҢ ТӘРТІБІНДЕГІ ҚАДАМ

Шымкентте Адырбеков көшесі, №70 ғимаратта заңсыз құрылыс анықталды. Бір қабатты монша, дүкен және салоны рұқсатсыз біріктіріліп, емдеу орталығына айналдырылған.

Қала басқармасы құрылыс иесіне заң талаптарын түсіндіріп, құрылыс тоқтатылды. Сондай-ақ, оған 800 мың теңгеден астам айыппұл салынды.

Құрметті тұрғындар! Құрылыс бастамас бұрын рұқсат алу және құрылыс нормаларын сақтау – қауіпсіздік пен заңдылықтың кепілі. Заң талаптарын орындау қаламыздың тәртібін сақтауға және қауіпсіз ортаны қамтамасыз етуге мүмкіндік береді.

Бұл туралы бүгін, Шымкент қаласы әкімдігінің ресми өкілі, қала әкімінің орынбасары – Сәрсен Абайұлы Құранбек мәлімдеді.

Заңға сәйкес құрылыс – жергілікті және мемлекеттік нормативтерге, рұқсаттау құжаттарына, құрылыс нормалары мен қауіпсіздік талаптарына толық сәйкес жүргізілетін құрылыс жұмыстары. Мұндай құрылыс елді мекендердің жоспарлы дамуын қамтамасыз етіп, тұрғындардың қауіпсіздігі мен қолайлы өмір сүруіне жағдай жасайды.

Заңға сай құрылыс жүргізу үшін жер телімінің қолдану мақсатына сәйкестігін анықтау, жобалау-сметалық құжаттаманы әзірлеу және тиісті мемлекеттік органдардан рұқсат алу міндетті. Сонымен қатар, құрылыс барысында техникалық қадағалау, сапа стандарттарына сәйкестік және қауіпсіздік талаптарын қатаң сақтау қажет.

Рұқсат құжаттары бар, талаптарға сай салынған нысандар:

• инфрақұрылымға дұрыс қосылады;
• қауіпсіздік нормаларын сақтайды;
• тұрғындар үшін қауіпсіз әрі қолайлы болады;
• болашақта заңдастыру немесе пайдалану кезінде қиындық туғызбайды.

Заңға сәйкес құрылыс – қалалық орта мәдениетінің, қоғам қауіпсіздігінің және әділ реттеудің маңызды бөлігі. Әрбір құрылыс бастамасы заң талаптарын бұлжытпай орындағанда ғана сапалы әрі қауіпсіз орта қалыптасады.