«ШЫМҚАЛА» ЭТНОАУЫЛЫ ЖАҢАРАДЫ, ЖАНДАНАДЫ
Қала әкімі Ғабит Сыздықбеков «Shymqala» этноауылын аралап, тыныс-тіршілігімен танысты.
Этноауыл 2021 жылы 1 мамыр — Қазақстан халқының бірлігі мерекесіне орай ашылды. Жалпы аумағы 2 гектарды құрайды. Мұнда 14 киіз үй тігіліп, 2 алтыбақан және «Шеберлер ауылы», алып тайқазан, киіз үлгісіндегі концерт залы орналасқан. Негізгі мақсат — келушілерге қазақ халқының тарихы, мәдениеті және дәстүрін насихаттау, материалдық, рухани байлығы салт-дәстүр, ұлттық ойыны мен тағамдарын әлемге танытып, отандық туризмді дамыту.
Аталған орталықтың ұйымдастыруымен ұмыт қалған ұлттық құндылықтарымыз бен салт-дәстүрлерімізді қайта ұлықтау мақсатында көптеген іс-шара ұйымдастырылып келеді. Мәселен, «Қызды оң босағаға шығару», «Ерулік беру», «Қыз ұзату» және т.б. дәстүрлеріміз жан-жақты насихатталуда.
Этноауылдың жер телімі құжат бойынша «Шымқала» тарихи-мәдени кешенінің меншігінде, ал мүлкі «Әдет-ғұрып және салт-дәстүр» орталығына тиесілі. Біржақты болуы үшін мүліктік меншік иесін «Шымқала» тарихи-мәдени кешенінің теңгеріміне беру мәселесі көптен бері көтеріліп, шешілмей келді. Қала әкімі жағдаймен танысқан соң, жауаптыларға мүліктік меншік иесін тез арада «Шымқала» тарихи-мәдени кешеніне өткізуді жүктеді. Сондай-ақ жабдықтары дерлік тозығы жеткен этноауылды қайта жаңартуды және бұл жобаны дамытып, жандандыра түсуді тапсырды.
Шымкент қаласы әкімінің баспасөз қызметі
Ara24.kz қоғамдық-саяси, ақпараттық танымдық, сатиралық сайт
Жүз жылдық тарихы бар азуын айға білеген «Ара» журналын әлеуметтік желі арқылы қайта жаңғыртып, қанат қақтыруды мақсат етіп отырмыз. Мұнда əзіл-сықақ, əжуа, мысал-мысқыл, пародия, эпиграмма, оқшау сөз секілді сатираның əрқилы саласын қамтып қана қоймай, алаяқтардың атын атап, түсін түстейтін яғни, нақты фактіге құрылған фельетон жанрын жандандырмақпыз. Біздің бағдарламаға баса назар аударсаңыз күлесіз де білесіз, білесіз де күлесіз. Əзілдеріңіз жарасып, əжімдеріңіз күлкінің ізін ғана көрсететіні сөзсіз.
