ШЫМКЕНТ: ЖАҢА ГҮЛЗАРЛАР МЕН СКВЕРЛЕР ПАЙДА БОЛАДЫ

Тұран ауданында тұрғындардың жайлы өмір сүруіне бағытталған абаттандыру жұмыстары белсенді түрде жүргізілуде. 2024 жылы демеушілердің қолдауымен екі жаңа демалыс орны ашылды. Оның бірі – Желтоқсан көшесінің бойында (Аэровокзал маңы) орналасқан аллея, екіншісі – «Мадлен» мейрамханасы аумағында (Шымкент қонақүйі маңында) ашылған сквер. 2025 жылы ауданда бірнеше жаңа гүлзарлар пайда болады.

Арғынбеков және Бәйтереков көшелерінің қиылысында 0,15 гектар аумаққа гүлзар салынады, Гагарин көшесіндегі 32, 34, 40, 42 үйлердің ауласында жаңа сквер бой көтереді, сондай-ақ Қабылбеков көшесінің бойында инвестициялық жоба аясында гүлзар орнатылады.

Балалар мен жастардың бос уақытын тиімді өткізуіне мүмкіндік жасау мақсатында 2024 жылы 40 жоба іске асырылды. Оның ішінде 30 балалар ойын алаңы, 8 балалар және спорт алаңы, 2 жеке спорт алаңы пайдалануға берілді. Ал 2025 жылы тағы 33 жоба жүзеге асырылады, оның ішінде 18 балалар ойын алаңы, 13 балалар ойын және ашық спорт алаңы, 2 ортақ пайдаланатын қоғамдық кеңістік салынбақ. Бұл жұмыстар аудан тұрғындары үшін ыңғайлы әрі заманауи демалыс орындарын қалыптастыруға мүмкіндік береді.