САЛЫҚТЫҚ ӘКІМШІЛЕНДІРУДІ ЦИФРЛАНДЫРУ – ӘДІЛДІК ПЕН ТИІМДІЛІККЕ БАСТАЙТЫН ҚАДАМ

Жаңа Салық кодексінің басты мақсаты – салық әкімшілендіруін оңайлатып, салық төлеуші мен мемлекет арасындағы өзара сенімді күшейту.

ҚҚС бойынша тіркеу шегі 10 000 АЕК болып белгіленді, ал тіркеу үш форматта жүзеге асырылады: ерікті, міндетті және шартты.

Мемлекеттік мекемелер мен арнайы режим қолданушылар тіркеуден босатылады.

Салық есептілігі айтарлықтай қысқарды: бұрынғы 39 нысанның 12-сі алынып тасталып, электрондық форматқа көшірілді. Кәсіпкерлер қызмет түрін өзгертсе, жүйе нысандарды автоматты түрде жаңартады.

Берешек сомасына қарай өндіріп алу кезең-кезеңмен жүзеге асырылады:

20 АЕК-ке дейін – ескерту,

20–45 АЕК – шотты бұғаттау,

45 АЕК-тен жоғары – мүлік есебінен өндіріп алу.

Үш айдан астам қарыз өтелмесе, сот арқылы елден шығуға шектеу қойылуы мүмкін.

Салықтық тексерулердің мерзімі де қысқарды: кешенді тексеру – 30 жұмыс күніне дейін, ал шағын бизнес үшін жалпы шегі – 180 күн.

Құжаттарды электронды түрде ұсыну мүмкіндігі берілді, ал шағын кәсіп иелерінен қағаз құжат талап ету екі ретпен шектелді.

Бұл өзгерістер цифрландыру мен ашықтықты арттырып, бизнеске сенімді әрі әділ салықтық орта қалыптастырады.

Салық әділдігі – мемлекет пен азамат арасындағы сенім мен тұрақтылықтың негізі. Әрбір азаматтың және кәсіпкердің заң бойынша салық төлеуі – елдің дамуына, әлеуметтік бағдарламалардың жүзеге асуына және қоғам әл-ауқатының артуына үлес қосады.

Әділ салық жүйесі – барлық адамдар үшін тең мүмкіндік пен жауапкершілікті қамтамасыз ететін тетік. Яғни табысы көп адам көбірек, ал табысы аз адам өз мүмкіндігіне қарай салық төлейді. Бұл – әлеуметтік әділдік пен экономикалық теңгерімділіктің көрінісі.

Салық әділдігі сонымен қатар ашықтық пен адалдықты талап етеді. Мемлекет жиналған қаражаттың қайда жұмсалатынын ашық көрсетіп, азаматтарға нақты нәтиже ұсынуы тиіс. Ал азаматтар өз кезегінде салық төлеу арқылы елдің өркендеуіне үлес қосады.

Салық әділдігі сақталған елде экономика дамып, халықтың әл-ауқаты жақсарады, қоғамда жауапкершілік пен сенім артады.