ШЫМКЕНТТЕ «ХАЛЫҚ ЗАҢГЕРІ» АКЦИЯСЫ ӨТТІ

Шымкент қаласы әкімі аппаратының ұйымдастыруымен қаладағы Арбат демалыс алаңында кезекті «Халық заңгері» республикалық акциясы өтті.
Іс-шараның мақсаты – тұрғындардың құқықтық сауаттылығын арттыру және азаматтарға тегін заңгерлік көмек көрсету. Акция барысында кез келген тұрғын білікті заңгерлерден өзіне қажетті құқықтық кеңес алу мүмкіндігіне ие болды.
Қабылдау жұмысына жергілікті атқарушы органдардың, аумақтық және құқық қорғау органдарының өкілдері, прокурорлар, тергеушілер, жеке сот орындаушылары, адвокаттар, нотариустар және өзге де заң саласының мамандары қатысты.
Акция барысында тұрғындар өздерін толғандырған өзекті мәселелер бойынша сауалдарына жауап алды. Әсіресе жер қатынастарына қатысты сұрақтар көп болды. Атап айтқанда, жер теліміне кезекке тұру, мемлекет мұқтажы үшін жерді алып қою, жер телімін заңдастыру, тұрғын үй кезегі мен баспананы жекешелендіру мәселелері бойынша кеңестер берілді.
Сонымен қатар қала инфрақұрылымын дамытуға қатысты ұсыныс-пікірлер мен сауалдар да қаралды.
Бұдан бөлек, қала кәсіпорындарында еңбек заңнамасының сақталуы, өндірістік жарақаттанудың алдын алу, сондай-ақ қызметкерлер алдындағы жалақы берешегін азайту бағытында атқарылып жатқан жұмыстар бойынша да түсіндіру жұмыстары жүргізілді.
Акция қорытындысы бойынша 84 азаматқа тегін заңгерлік кеңес берілді.
Халықтың құқықтық сауаттылығын арттыру, азаматтардың заңды мүдделерін қорғау және құқықтық мәселелер бойынша тегін кеңес беру – қоғамдағы заң үстемдігін қамтамасыз етудің маңызды бағыттарының бірі. Осы мақсатта елімізде азаматтарға құқықтық көмек көрсетуге бағытталған «Халық заңгері» акциясы ұйымдастырылып келеді.
Аталған акцияның негізгі мақсаты – тұрғындарға заңгерлік көмекті қолжетімді ету, олардың құқықтық сауаттылығын арттыру және күнделікті өмірде кездесетін түрлі құқықтық мәселелердің шешімін табуға жәрдемдесу.
Акция аясында тұрғындар тәжірибелі заңгерлерден, адвокаттардан, нотариустардан, мемлекеттік органдар мен құқық қорғау саласының өкілдерінен тегін кеңес ала алады. Мамандар азаматтардың өтініштерін тыңдап, заңнама талаптарын түсіндіреді, құқықтары мен міндеттері туралы ақпарат беріп, тиісті мәселелер бойынша бағыт-бағдар көрсетеді.
Кеңес беру барысында еңбек қатынастары, әлеуметтік төлемдер, тұрғын үй мәселелері, жер даулары, отбасылық құқық, алимент өндіру, мұрагерлік, кәсіпкерлік қызмет және басқа да өзекті тақырыптар қамтылады. Сонымен қатар азаматтарға құқық бұзушылық жағдайында қандай әрекет жасау керектігі және қай мемлекеттік органға жүгіну қажеттігі түсіндіріледі.
Мұндай акциялардың маңызы зор. Себебі көптеген азаматтар өз құқықтары мен заңда қарастырылған мүмкіндіктерін толық біле бермейді. Ал білікті маманның кеңесі мәселені дер кезінде шешуге, заңсыз әрекеттердің алдын алуға және азаматтардың құқықтық қорғалу деңгейін арттыруға мүмкіндік береді.
«Халық заңгері» акциясы – халық пен заң саласының мамандары арасындағы байланысты нығайтатын маңызды қоғамдық бастама. Оның басты ерекшелігі – әрбір азаматқа әлеуметтік жағдайына қарамастан тегін құқықтық көмек алу мүмкіндігін ұсыну.
Құқықтық сауатты қоғам қалыптастыру – баршамызға ортақ міндет. Заңды білу – өз құқығыңды қорғаудың алғашқы қадамы. Ал заң талаптарын сақтау мен азаматтардың құқықтық мәдениетін арттыру елдегі қоғамдық тәртіп пен тұрақтылықты нығайтуға ықпал етеді.













