АУДАНДЫҚ МӘСЛИХАТТЫҢ КЕЗЕКТЕН ТЫС 23-ШІ СЕССИЯСЫ ӨТТІ

Сауран ауданы әкімдігі аппаратының мәжіліс залында жетінші шақырылымдағы аудандық мәслихаттың кезектен тыс жиырма үшінші сессиясы болып өтті. Сессияны Сауран аудандық мәслихатының хатшысы М.Күнпейісов ашып, жүргізіп отырды. Сессияға аудан әкімі Ғ.Рысбеков, аудандық мәслихат депутаттары, аудан әкімінің орынбасарлары, дербес бөлім басшылары, ауылдық округ әкімдері қатысты.

Сессияның күн тәртібіне сәйкес, 9 мәселе қаралды. Мәжілістің күн тәртібіне сәйкес, Сауран ауданы әкімдігінің дербес құрамына келісім беру, Сауран ауданы әкімдігі жанындағы терроризмге қарсы комиссияның дербес құрамын бекіту, Сауран ауданы әкімдігі жанындағы сыбайлас жемқорлыққа қарсы іс-қимыл мәселелері жөніндегі комиссияның дербес құрамын бекіту, Сауран ауданы әкімдігі жанындағы құқық бұзушылық профилактикасы жөніндегі ведомоствоаралық комиссияның дербес құрамын бекіту, Сауран ауданы әкімдігінің жанындағы әйелдер істері және отбасылық-демографиялық саясат жөніндегі комиссияның құрамын бекіту туралы аудан әкімі аппаратының басшысы Д.Құдияров баяндама жасады.

Сонымен қатар, Сауран ауданында тұрғын үй көмегін көрсетудің мөлшері мен тәртібін айқындау туралы аудан әкімдігінің жұмыспен қамту және әлеуметтік бағдарламалар бөлімінің басшысы Д.Асылбек, Сауран аудандық жер комиссиясының құрамын және комиссия туралы ережені бекіту туралы аудан әкімдігінің жер қатынастары бөлімінің басшысының орынбасары А.Патсаев, Сауран аудандық мәслихатының 2021 жылғы 28 желтоқсандағы №84 «2022-2024 жылдарға арналған ауылдық округтердің бюджеттері туралы» шешіміне өзгерістер енгізу туралы аудан әкімдігінің экономика және қаржы бөлімінің басшысы И.Мырзахметов хабарлама жасады. Күн тәртібіндегі қаралған мәселелер бойынша тиісті шешім қабылданды.