ӘЛЕУМЕТТІК НЫСАНДАР МҮГЕДЕК АДАМДАРҒА БЕЙІМДЕЛУДЕ

Түркістан облысында 133 әлеуметтік нысан мүгедектігі бар адамдарға толығымен бейімделді. Еңбекмині баспасөз қызметі мәлім еткендей, мүгедектігі бар адамдардың заңды құқықтарын қамтамасыз ету мақсатында Түркістан облысында 229 әлеуметтік инфрақұрылым нысан бейімделді. Оның ішінде 133 нысан ерекше қажеттіліктері бар адамдардың барлық санатына толықтай сәйкестендірілді.

Бұдан бұрын хабарланғандай, елімізде 2027 жылға дейін Қазақстан Республикасында мүгедектігі бар адамдардың құқықтарын қамтамасыз ету және өмір сүру сапасын жақсарту жөніндегі ұлттық жоспар, «АMANAT» партиясының Жол картасы және Мемлекет басшысының тапсырмасы бойынша әзірленген «Халықпен бірге» жобасы іске асырылуда.

Жобада қол жетімділіктің интерактивті картасы сайтына енгізілген ел бойынша бейімделуі тиіс 35 мыңнан астам басым нысан айқындалды. 2021-2022 жылдары 8 мыңнан астам нысан, 2023-2027 жылдар кезеңінде жыл сайын кемінде 5 мың нысан (5 жылда 27 мың) бейімделуге тиіс. Осы жылдың 1 қарашадағы жағдай бойынша 2021-2022 жылдарды қоса алғанда, 11261 нысан бейімделген.

Түркістан облысында 5 жыл ішінде мүгедектігі бар адамдардың барлық санаты үшін 3033 нысанды бейімдеу қарастырылған. Қазір жергілікті атқарушы органдар 2023 жылға бейімдеуге жоспарланған 607 нысанның 229-ында бейімдеу іс-шараларын жүргізді. Еңбекмині Еңбек және әлеуметтік қорғау комитетінің Түркістан облысы бойынша аумақтық департаменті жүргізген бақылаудан кейінгі тексерулер барысында 133 нысанның толық бейімделгені расталды, — делінген министрлік таратқан хабарламада.

Мәселен, өңірде мүгедектігі бар адамдардың барлық санаттарына қол жетімді: білім беру нысандары – 47 (жалпы білім беретін орта мектептер), мәдениет нысандары – 14 (мәдениет үйлері және ауылдық клубтар), спорт нысандары – 21 (спорт кешендері), денсаулық сақтау нысандары – 20 (аудандық және қалалық ауруханалар), мемлекеттік мекемелер – 13 (аудандық әкімдіктер мен бөлімдер), шағын және орта бизнес нысандары – 18 (дүкендер және басқалар). 96 нысан ішінара бейімделген деп танылды, сонымен қатар 378 нысан қосымша бейімделеді.

Бұдан басқа, мемлекеттік бақылау шеңберінде Департаментпен мемлекеттік басқару, денсаулық сақтау, әлеуметтік қорғау, мәдениет және т.б. салалардағы әлеуметтік инфрақұрылым объектілеріне 90 тексеру жүргізілді. Оның ішінде: 65 – жоспардан тыс тексеру және 25 – профилактикалық бақылау шеңберінде болды. Тексеру қорытындысы бойынша нысандардың басшылығына анықталған бұзушылықтарды жою туралы 84 ұйғарым беріліп, 11,9 млн теңге сомасына 64 әкімшілік айыппұл салынды. Нысандар-дың меншік иелеріне алдын ала бақылау жүргізу кезінде бұзушы-лықтар алғаш рет анықталған кезде оларды әкімшілік жауапкершілікке тартпай, жою туралы нұсқамалар ғана берілетінін атап өту қажет. Нұсқама белгіленген мерзімде орындалмаған жағдайда айыппұл салынады.