ПРЕЗИДЕНТ САЙЛАУЫ: ЖҰМАТАЙ ӘЛИЕВ ҚҰЖАТТАРЫН ТАПСЫРДЫ

ҚР Орталық сайлау комиссиясына Жұматай Әлиевтің Қазақстан Республикасының Президенттігіне кандидат болып ұсынылғаны туралы құжаттары келіп түсті. Бұл туралы Орталық сайлау комиссиясының баспасөз қызметі хабарлады.

ОСК мәліметінше, 2022 жылғы 10 қазанда Қазақстан Республикасының Орталық сайлау комиссиясына «Қазақстан Республикасындағы сайлау туралы» Қазақстан Республикасы Конституциялық Заңының 54 және 55-баптарына, сондай-ақ «Қазақстан Республикасы Президентінің 2022 жылғы 20 қарашаға тағайындалған кезектен тыс сайлауы бойынша сайлау құжаттарының нысандарын белгілеу туралы» Қазақстан Республикасы Орталық сайлау комиссиясының 2022 жылғы 23 қыркүйектегі № 67/545 қаулысына сәйкес Жұматай Әлиевтің «Халық демографиясы» қоғамдық бірлестігінен Қазақстан Республикасының Президенттігіне кандидат болып ұсынылғаны туралы келесі құжаттары ұсынылды:

1. «Халық демографиясы» қоғамдық бірлестігінің жоғары органы отырысының Қазақстан Республикасының Президенттігіне ұсыну туралы хаттамасынан үзінді;
2. Ж. Әлиевтің Қазақстан Республикасының Президенттігіне кандидат болуға келісімі туралы өмірбаяндық деректері қоса берілген өтініші;
3. Қазақстан Республикасы Орталық сайлау комиссиясының шотына сайлау жарнасының енгізілгенін куәландыратын құжат;
4. Жеке басын куәландыратын құжаттың көшірмесі;
5. Жоғары білімі туралы дипломдарының көшірмелері.

Айта кетейік, Жұматай Әлиев 2012 жылдың қаңтарынан 2016 жылдың қаңтарына дейін Мәжіліс депутаты болған, оған дейін әр жылдары Қазақстан халқы Ассамблеясы хатшылығының меңгерушісі, ассамблея төрағасының орынбасары қызметтерін атқарған.

Әлиев бұған дейін де, яғни 2019 жылғы сайлауда Қазақстан президенттігіне кандидат ретінде ұсынылған еді. Алайда ол мемлекеттік тіл емтиханынан сүрінген болатын.

Түркістан облысының Өңірлік коммуникациялар қызметі