НҰРБОЛ ТҰРАШБЕКОВ: «КӘСІПКЕРЛЕР ДАУЫ МИТИНГІМЕН ЕМЕС, СОТПЕН ШЕШІЛЕДІ»

Түркістандағы «Ақжол» ЖШС-нің үш жүзге жуық жүргізушілері ереуілге шықты. Осыған орай, Түркістан қаласының әкімдігі, прокуратура мен еңбек инспекциясы «Ақжол» ЖШС жұмысшыларының жалақы ала алмау мәселесі бойынша тексеріс аяқталғаны жөнінде баспасөз конференциясын өткізді.

«Ақжол» ЖШС-да 752 жұмыскердің алдында осы жылдың наурыз, сәуір және мамыр айлары үшін жалпы сомасы 232 млн 449 мың теңге жалақыдан қарыз орын алғаны анықталғанын айтты.

— «Ақжол» ЖШС-і ҚР ӘҚБтК-нің 87-бабы 1-тармағына сәйкес, әкімшілік жауапкершілікке тартылды. Тексеру қорытындысы бойынша «Ақжол» ЖШС-і басшысы атына ҚР Еңбек заңнамасының бұзушылықтарын жою бойынша орындалуы міндетті нұсқама берілген. Нұсқама талабын орындату бойынша басқарма тарапынан жұмыс жүргізілуде»,- деді Түркістан облыстық еңбек инспекциясы жөніндегі басқарма басшысының міндетін атқарушы Асқар Сейтқазин.

Түркістан қаласының әкімі Нұрбол Тұрашбековтың мәліметінше, «Ақжол» ЖШС 2017 жылдан бері қосалқы мердігер ретінде қала аумағындағы бірнеше құрылыс жұмыстарына қатысып келген. 2021 жылы Қожа Ахмет Ясауи атындағы ХҚТУ тас жолынан Отырар мөлтек ауданына баратын жолдың күрделі жөндеу нысанына қатысты қазіргі таңда сот процесі жүруіне байланысты қала әкімдігі тарапынан қаржы аударылмаған. Сот аяқталған соң шешіміне сәйкес, төлемдер жүргізілетін болады. «Ақжол» ЖШС жұмысшыларына жалақы төлей алмауының негізгі кредиторлық берешегі — құрылыс материалдары құнының өсуімен немесе жоғарыда аталған ЖШС мердігер немесе қосалқы мердігер болған жеке компаниялармен байланысты туындаған.

— «Көтеріліп отырған мәселеде «Ақжол» ЖШС бас мердігер емес, қосалқы мердігер ретінде жұмыстар жүргізген. Бас мердігер мен қосалқы мердігер арасындағы мәселеге араласу әкімдік құзырына кірмейді. Аталған мәселе сотқа дейінгі реттеу тәртібімен немесе экономикалық сотта шешілуге тиіс. Митингілер мен шерулер мұндай мәселелерді шешпейді», — деді қала әкімі.

Қаланың бас прокуроры Жаннұр Ахметбек кез келген жұмыс беруші жұмысшылардың еңбекақысын заңмен көзделген мерзімде толық төлеуге міндетті екенін айтып, «Жұмыс берушінің жалақы төлеуде біреуге сілтеме жасап, жалтаруға құқы жоқ», -деді.

Брифинг барысында бас мердігер «Capital Construction Projects Kazahkstan» ЖШС-і өкілі Бақытжан Есалиев «Ақжол» ЖШС-нен 190 миллион теңгеге орындалған жұмыстарды салыстырып тексеруге қол жеткізе алмағанын жеткізді.

Ал, әкімшілік ғимараттардың бірінің бас мердігері – «Континент Транзит» компаниясының өкілі Абдуғани Абдукадыр «Ақжол» ЖШС қосалқы мердігері өзіне алған міндеттемелерін орындамағанын және құрылыс жұмыстарын аяқтамай кетіп қалғанын, онымен қоймай бас мердігерден 150 млн теңге талап етіп отырғанын айтып отыр.

«Алдағы уақытта серіктестік атқарған жұмыстары бойынша бас мердігерге толыққанды мәлімет беруі міндетті. Талап орындалған жағдайда тиісті соманың барлығы төленеді», — деді қала әкімі брифингтегі пікірсайысты қорытындылап.

«Шынтуайтына келгенде, құрамында бір емес, он екі кәсіпорны бар ірі корпорация басшысы, белгілі кәсіпкердің қарамағындағыларына 4 айдан бері жалақы бере алмауы қисынсыз. Тас, асфальт, темір бетон, кірпіш шығаратын зауыттар мен наубайхана және аграрлық секторды меңгеріп отырған бизнесменнің өзіне бұл әрекеті жақсы ат, абырой әпермесі рас. Оның үстіне, жалған қарекетке еңбеккерлерін итермелеуі – оңбастың тірлігі болды»,-дейді жергілікті блогер Сәбит Тастанбек. Әкім өткізген брифинг пен «Ақжол» ЖШС жұмысшылары өткізген бір апталық ереуіл қорытындысын жасасақ, екі бизнес нысанының арасындағы қаржылық мәселе тек экономикалық соттың шешімімен шығарылатындығы айдан анық.