БІЗДІҢ КҮШІМІЗ — БІРЛІКТЕ

22

Мемлекет басшысы Қасым-Жомарт Тоқаев еліміздің бірқатар облысындағы су тасқыны салдарынан қалыптасқан күрделі жағдайға байланысты Қазақстан халқына үндеу жариялады.

Президент өз сөзінде су тасқынына байланысты еліміздің он аймағында төтенше жағдай жарияланғанын тілге тиек етіп өтті.

«Бүгін мен еліміздің азаматтарына арнайы үндеуімді жолдап отырмын. Баршаңызға белгілі, қазір елімізде күрделі жағдай қалыптасып отыр. Қардың күрт еруіне байланысты аймақтарда су тасқыны болып жатыр. Бұл – табиғи апат. Мұндай ахуал ұзақ жылдан бері болмаған. Бұл көлемі жағынан соңғы 80 жылдан бергі ең ірі табиғи апат деуге болады.

Су тасқынына байланысты еліміздің он аймағында төтенше жағдай жарияланды, яғни Абай, Ақмола, Ақтөбе, Атырау, Батыс Қазақстан, Қарағанды, Қостанай, Павлодар, Солтүстік Қазақстан және Ұлытау облыстарында.

Атқарушы органдар жіберген олқылықтарды түзеу үшін мен шұғыл түрде нақты тапсырмаларды бердім. Қазір барлық қажетті шаралар қабылданып жатыр. Үкімет қарғын судың салдарын жоюға бар күшін салып жатыр», — деді Президент.

Апаттың айтып келмейтіні анық. Табиғатқа қарсы тұрар күш жоқ. Оны болжап білу де мүмкін емес. Бұл – соңғы жылдардағы ең үлкен су тасқыны.

Қазіргі таңда тиісті мекемелер өңірдегі су қоймаларының жағдайын қатаң бақылауға алып жатыр. Табиғи апатқа қарсы күреске жергілікті тұрғындар, еріктілер де үлес қосуда.

Төтеннен келген апаттан зардап шеккендерге бір Алла жар болсын! Жаратқан жеңілдігін берсін! Еліміз аман, жұртымыз тыныш болсын!

Надыр Хасантаев,

«Ассамблея жастары» РҚБ-нің Түркістан облыстық өкілдігінің белсенді мүшесі